ஒரு புலியின் காதல்!

நன்னீராய் இருந்த என் மனதில்
வானவில்லாய் கலந்து
வண்ண மயமாய் மாற்றி விட்டாய் !

செந்நீர் சிந்தும் போர்களத்தில்
தமிழ் வேள்விக்காக
என் உறவுகள் தொலைத்து
கண்ணீர் தாங்கிய கன்னத்தை
உன் ஒற்றை விரலால் துடைக்கும்
பரிசத்தில் உணர்த்தினாய் என் புதிய உறவை!

இசை ஓர் அந்நிய மொழி என்பேன்
அதையே என் வாய் மொழி ஆக்கினாய்!
ஓவியம் என் காகிதங்களில்
உள்ள கிறுக்கல்கள் என்பேன் .
அவற்றை உன் உருவங்கலாக்கி
என்னை அதன் ரசிகனாக்கினாய்!
கவிதை காதலிப்பவனின் புலம்பல் என்பேன் ,
என்னையும் கவியாக்கி
என் புலம்பல்களை கவிதையாக்கினாய்!

போரின் தாக்கத்தால் தகர்ந்து போன
என் தன்னம்பிக்கையை
மீண்டும் என் மனதில் தாரைவார்த்து
என்னை சந்தோஷ வானில் பறக்க செய்தாய் !
 
மகிழ்ச்சியாய் இருக்கும்
ஒவ்வொரு நாளும்
உன் ஆயுளின் கூடுதல் நாளே என்று
என் வாழ்வில் மூன்று வருடங்களை கூடிவிட்டாய் !

கடவுள் ஒன்றும் முட்டாள் அல்ல
உன்னை நிரந்தரமாக்கி
என்னை முடிவிலியாக்க!

தாய் மொழி பேசிய
ஒரே காரணத்திற்காக
வாடிய மலர்களில் ஒன்று நீ!
பதுங்கிய புலிகளில் ஒன்று நான்!

விரைவில் பாய தயாராகிறேன்
நான் உன் மீது கொண்ட காதலுக்காக
மட்டும் அல்ல நாம் நம் மண் மீது
கொண்ட காதலுக்காகவும்!

என்றும் வேட்கையுடன் !

ராஜா.....

கடைகோடி குடிமகனாய்!

எதுவும் மாறவில்லை !
இந்த நாட்டில் கடந்த
பத்தாண்டுகளில் எதுவும் மாறவில்லை !

இந்தியாவின் பொருளாதார
வளர்ச்சி பற்றி வரும்
செய்திகளில் உள்ள
எழுத்துக்கள் யாவும் எனக்கு
கிறுக்கல்களே !

சென்னையின் வீட்டு வாடகை
அதிகரிப்பும் ,
பெங்களூர் பெண்கள் அணியும்
ஆடைகளின் அளவு சுருக்கமும் ,
மும்பை மக்கள் இடநெருக்கடி
தேவை அதிகரிப்பும் ,
டெல்லியின் இந்திராகாந்தி
விமானநிலைய விரிவாக்கமும் ,
எல்லா ஊர்களின் IPL அணிகளின்
லாப அதிகரிப்பும் ,
எதையும் மாற்றவில்லை
நாட்டின் கடைகோடியில் வாழும்
இந்த தமிழனின் வாழ்க்கையில் !

எனது வேகமும் குறையவில்லை !
தேகமும் மாறவில்லை!
நான் சிந்தும் வியர்வைவும்
குறையவில்லை!
உண்ணும் உணவும்
அதிகரிக்கவில்லை!

மாற்றங்களே இல்லா வாழ்க்கை
வாழ ஒரு சிலரே
தகுதி கொள்கையில்
அத்தகுதியை எனக்கு அளித்தமைக்காக
கடவுளின் புகழ்பாடும் இவ்வேளையில்
உணர்கிறேன் ஓர் இனிய
மாற்றத்தை!

நாளையோ எனது 35வது தீபாவளி
எனது வாழ்வில் 25வது தீபாவளியோடு
ஓர் சிறிய ஒப்பீடு !

அன்றும் இன்று போல்தான்
ஓய்வில்லாமல் உழைக்கிறேன்
சிந்தும் வியர்வையில் மாற்றமில்லை
உடலின் திறனிலும் மாற்றமில்லை
ஆனால் மனதின் திட்டத்தில்தான்
ஓர் சிறிய மாற்றம் !

அன்றைய உழைப்பு முழுதும்
மறுநாள் மதுவிற்காக !
இன்றைய உழைப்போ என்
மகளின் புத்தாடைக்காக !

நாளை இப்புத்தாடையால் அவளின்
முகம் மலர என் அகம் குளிர
ஒப்புக் கொள்கிறேன்
என் வாழ்வின் பெருமாற்றத்தை....
இனிய மாற்றம் தான்!

---------------------------ராஜா

பிறந்த நாள்!

வித்திட்ட தந்தைக்கும்
விளைவித்த அன்னைக்கும்
பேர் உவகை தந்த நாள்.

ஆணோ ,பெண்ணோ
கருப்போ ,சிவப்போ
அங்கமெல்லாம் அமைப்பாய்
பிறக்க வேண்டும் என்ற
வேண்டுதலுக்கும் ,விரதத்திற்கும்
வரமாய் வந்த நாள்.

அது வரை அவர்களுக்கு
பரந்திருந்த உலகம்
முதல் முறை ஓர் குழந்தையாய்
சுருங்கிய நாள்.

இன்று வரை அவர்களுக்கு
விரிவடையா அவ்வுலகில்
நான் பெற்ற வெற்றிகளை
மட்டும் எனக்கு வெளிச்சமிட்டு காட்டி
தோல்விகளை இன்னும் தோளில்
சுமக்கும் என் பெற்றோருக்கு
இந்நாளை மட்டும் அல்ல
என் வாழ்வையே சமர்பிக்கிறேன்.

பச்சைக் கொடி

சுட்டெரிக்கும் வெயிலில்
கல் உடைக்கும் குவாரியில்
பொறி தெறிக்க கல் உடைத்து
காய்த்த கரங்கள் எழுதிய தீர்ப்பு.

பகலவன் பார்த்து
கார் கணித்து ஏர் பிடித்து
நிலம் உழுது பயிர் அறுத்து
வயிர் நிரப்பும்
அன்னையின் கரங்கள் எழுதிய தீர்ப்பு!

ஆடை இல்லாத மனிதன்
அரை மனிதன்
அனைவரையும் முழு மனிதனாக்கி
அழகு பார்க்க நித்தமும்
தறி அடித்து வலி கொண்ட
கரங்கள் எழுதிய தீர்ப்பு!

அம்மாவோ , அய்யாவோ
சிவப்பைத் தாண்டினால் ரூ.50
என்று பாரபட்சம் இன்றி
எவரிடத்திலும் நீளும்
காவல் கரங்கள்
எழுதிய தீர்ப்பு!

கோடான கோடி
கரங்கள் எழுதிய தீர்ப்பு
இன்று அறிவிக்கப்படும் நாள்!

கரங்கள் எழுதிய தீர்ப்பு
எதுவானாலும் சாதகம் தான்
கரை படிந்த கரங்களுக்கு.

சூரியனோ , இலையோ
பச்சை கொடி தான்
ஊழலுக்கு !

தந்தையாய் சிந்திக்கையில்!

உனது முத்தங்களின் எண்ணிக்கையில்
அறிந்தேன் உனது வயதின் வருடங்களை.

உனது அணைப்பின் இறுக்கத்தில்
உள்ள வலியில் உணர்ந்தேன்
நம் பிரிவின் வலியை.

ஆயிரம் தேசம் போய் வந்தேன்
எங்கேனும் காணவில்லை
உன் முகத்தில் காணும்
பரவசத்தை.

நூறு மொழியேனும் கேட்டிருப்பேன்
எவையேனும் மிஞ்சவில்லை
உன் மழலை மொழியை.

ஓர் விளையாட்டு வீரன் நான்
வெற்றிகளே எனக்கு சுகம் தரும்.
முதல் முறை மகிழ்கிறேன்
மகளே உன்னிடம்
நான் தோற்க்கையில்.

தங்கையே வருக !

முந்தி பிறந்ததால் நீ அக்கா.
பிந்தி பிறப்பதால் அவள் தங்கை.

மார்கழியில் பூசொரிந்தாய்
தையில் பொங்கல் தந்தேன்
சித்திரையில் சினம் கொண்டு சுட்டெரித்தாய்
கார்த்திகையில் சொட்ட நனைந்து சுகம் தந்தாய்

உன்னை சந்தித்த நாள் முதல்
உன்னோடு நானிருந்தேன் என்னோடு நீயிருந்தாய்
சுகமும் தந்தாய். சோகமும் தந்தாய்
காதலும் தந்தாய் மோதலும் தந்தாய்

எனினும் ஓர் விநாடியேனும்
நமக்குள் பிரிவில்லை
உன்னிடம் எனக்கு கோபமும் இல்லை

பின்பு ஏன் என்னை விட்டு பிரிகிறாய்
நொடி பொழுதில் ?
வினாவிற்கு விடை அளிக்கிறாய்
காதோரத்தில் .

என் தங்கை வருகிறாள்
உனை கவனிக்க
என்னை விட வேகமானவள்
சமாளிக்க தயாராய் இரு
உனக்கும் ஓர் வயது கூடி இருக்குமென்று .

உன் தங்கை பெயர்? என்றேன்

என்னுடன் ஒன்றை கூட்டி விடு
2011 என்றாய்.

களி(ழி)

கவிதைகளுடன் களிக்கிறேன்
என் கணங்களை
நான் உனைக் காதலித்த நாள் முதல்!

கண்ணீருடன் கழிக்கிறேன்
என் கனங்களை
நீ அவனைக் காதலித்த நாள் முதல்!